"იქს–ადამიანები: პირველი კლასი / X-men: First Class" - განხილვა

ცოტა ხნის წინ კინოთეატრ რუსთაველში შედგა მარველის კომიქსებზე დაფუძნებული ფრენჩაიზის, იქს–ადამიანების კიდევ ერთი ფილმის, "იქს–ადამიანები: პირველი კლასის" პრემიერა. ფილმის რეჟისორია მეთიუ ვონი, რომელიც აქამდეც ძალიან ახლოს იყო "იქს–ადამიანები: უკანასკნელი ბრძოლის" სარეჟისორო სკამთან, თუმცა გადაღების დაწყებამდე ორი კვირით ადრე ის ბრეტ რატნერით შეცვალეს. მთავარ პერსონაჟებს, ერიკ ლენშერსა (მაგნეტო) და ჩარლზ იქსავიერს (პროფესორი იქსი) განასახიერებენ მაიკლ ფასბენდერი და ჯეიმს მაკევოი. ფილმში ასევე მონაწილეობენ კევინ ბეიკონი, ჯენიფერ ლოურენსი, ჯენუარი ჯონსი, როუზ ბირნი და სხვები.

ფილმი იწყება იმ სცენით, რომელშიც ერიკს აცილებენ თავის მშობლებს. მიუხედავად იმისა, რომ ვონმა ეს სცენა თავიდან გადაიღო, ის ძალიან ჰგავს ანალოგიურ სცენა პირველი იქს–ადამიანებიდან. აღსანიშნავია, რომ ვონმა ამ სცენაში ასევე გამოიყენა რამდენიმე კადრი სინგერის "იქს–ადამიანებიდან". ძალის გამოვლენის შემდეგ ის ნაცისტი ოფიცერის სებასტიან შოუს ყურადღების ქვეშ ექცევა, რომელიც მას ტკივილისა და ტრამვის მეშვეობით აიძულებს თავისი ძალები გამოიყენოს. სიუჟეტი შემდეგ მოგვითხრობს ახალგაზრდა ჩარლზისა და ერიკის შესახებ. პირველი მათგანი წარმატებული პროფესორია, მეორე კი კვლავ სებასტიან შოუზე ნადირობს.

სიუჟეტი ვითარდება 60–იან წლებში, ცივი ომის პერიოდში, თუმცა დიალოგებში ეს მაინცდამაინც არ იგრძნობა და თანამედროვეს უფრო ემგვანება. ფილმს სიძველის ელფერი მხოლოდ შემდგომში ეძლევა კენედის გამოსვლების ვიდეოჩანაწერისა და სამხედროების (განსაკუთრებით რუსების) გამოჩენისას.

პროფესორი იქსი

"იქს–ადამიანები: პირველი კლასის" გამოცხადებისას, მაყურებელთა უმეტესობა იქნებოდნენ ისინი კომიქსების ფანები თუ ტრილოგიის, საკმაოდ კრიტიკულად განეწყვნენ მის მიმართ და კარგს არც არაფერს მოელოდნენ. ეს გამოწვეული იყო იმ ფაქტიდან, რომ ბრაინ სინგერის წასვლის შემდეგ ბრეტ რატნერის "იქს–ადამიანები: უკანასკნელი ბრძოლის" წარუმატებლობამ ფრენჩაიზის პოტენციალი შეარყია, ანუ პროდიუსერებმა პრიქველების გადაღებაზე დაიწყეს ფიქრი. პირველი კლასისადმი დამოკიდებულება კიდევ უფრო გაამწვავა ერთ–ერთი ამგვარი სურათის, "იქს–ადამიანების წარმოშობა: სამურავის" წარუმატებელმა გამოსვლამ, რომელმაც უარყო კიდეც ტრილოგიის სცენარის რაღაც ნაწილები. თუმცა ყველას გასაკვირად ფილმი, როგორც ცალკე მდგომი ნაწარმოები გაცილებით უკეთესი გამოვიდა, ვიდრე მისი წინამორბედები. ეს წარმატება ფრენჩაიზისთვის ახალი სიცოცხლის შთანერგვის იმედსაც ბადებს, თუმცა აქ ყველაფერი უფრო რთულადაა. პირველი კლასი თავისმხრივ წინააღმდეგობაში მოდის მესამე სერიასა და სამურავთან, რის გამოც მას ხშირად ერთდორულად პრიკველ/რებუთს უწოდებენ.

მაგნეტო "პირველ კლასში" 

მიუხედავად იმისა, რომ პირველი კლასი მთლად არ არის ტრილოგიის პრიკველი, მთელი ფილმი ემსახურება ჩარლზისა და ერიკის პერსონაჟებისა და მათი ურთიერთობის განვითარებას, იმისთვის რომ საბოლოოდ მათგან დადგეს ის პროფესორი იქსი და მაგნეტო, რომელსაც აქამდე ვიცნობდით. და რაც მთავარია, ეს შესამზადებელი ფუნქციით დატვირთული სცენარი საუკეთესოა მთელი ფრენჩაიზის სცენარებს შორის. მაიკლ ფასბენდერისა და ჯეიმს მაკევოის დუეტი კიდევ უფრო მეტ ეფექტს სძენს ამ ისტორიას. ყველაზე საინტერესო მაინც მაგნეტოს პერსონაჟის განვითარებაა, როგორ გადაიქცა უწყინარი ებრაელი ბავშვი ჩარლზისა და იქს–ადამიანების მთავარ მოწინააღმდეგედ, თანაც ისე რომ ფილმის ბოლომდე ის მაყურებლისთვის ისეტივე დადებითი პერსონაჟია, როგორც დასაწყისში იყო.

სამაგიეროდ სურათის ერთადერთ მნიშვნელოვან უარყოფით მხარეს წარმოადგენენ დამხმარე პერსონჟები. ახალგაზრდა მუტანტები (მისტიკის გამოკლებით) სიუჟეტში მხოლოდ იმისთვის არიან ჩართულნი, რომ იქს–ადამიანებები გუნდია, რომლის წევრებიც ექშენის სცენებისთვის არიან საჭირონი. მოკლედ მეთიუ ვონს ახალი პერსონაჟების შემოყვანა არ გამოუვიდა, მათ შორის ემა ფროსტისაც. კომიქსში ის საკმაოდ საინტერესო პერსონაჟია იმით, რომ დგება ჯინ გრეისა და ციკლოპს შორის. ამ ორი გმირის არ ყოფნამ კი ფროსტი უინტერესო პერსონაჟად აქცია. ერთადერთი დატვირთვა, რაც ვონმა ჯენუარი ჯონსზე გააკეთა, იყო მაყურებლების მოზიდნა მსახიობის გარეგნობითა და ჩაცმულობით. კიდევ ორი საინტერესო პერსონჟია CIA-ის აგენტი მოირა მაკტაგერტი და სებასტიან შოუ. საწყის კადრებში კევინ ბეიკონის მიერ განსახიერებული სს–ის ოფიცერი სებასტიან შოუ აუცილებლად მოგაგონებთ კრისტოფ ვალცს ტარანტინოს "უსახელო ნაბიჭვრებიდან".

ემა ფროსტი და სებასტიან შოუ

კომიქსზე დაფუძნებული ფილმები ძირითადად მოტივირებულია ექშენზე, რაშიც არც "იქს–ადამიანები: პირველი კლასი" მოიკოჭლებს, განსაკუთრებით მისი წინამორბედის "სამურავის" შემდეგ. ფილმის მეორეხარისხოვანი მსახიობები სწორედ აქ იჩენენ თავს და არც ისე ურიგოდ. სპეც–ეფექტები არ იყო გასაოცარი, თუმცა სავსებით დამაკმაყოფილებელი. ეს არის მთავარი ფაქტორი, რომელიც ფილმს განასხვავებს იქს–ადამიანების ფრენჩაიზის სხვა ფილმებისგან. ის უფრო ფოკუსირებულია სიუჟეტსა და პერსონაჟბზე, ვიდრე ექშენზე, რაც მას იქს–ადამიანების სერიის საუკეთესო ფილმად აქცევს.

საბოლოო შეფასება

4/5

თქვენ რას ფიქრობთ ფილმზე?


მოგვიწონეთ Facebook-ზე

Read More

სტივენ სპილბერის "საბრძოლო ცხენი" - პირველი ტრეილერი

სტივენ სპილბერგის ახალი სამხედრო ფილმის "საბრძოლო ცხენის" პირველი ტრეილერი უკვე დაიდო ინტერნეტში. აქამდე Dreamworks-ს უკვე ჰქონდა გამოქვეყნებული რამოდენიმე სურათი ფილმიდან და მისი გადაღებებიდან. ფილმი დაფუძნებულია მაიკლ მორპურგოს ამავე სახელწოდების საბავშვო ნოველაზე და მოგვითხრობს ცხენის, ჯოის შესახებ, რომელიც გაყიდვის შემდეგ მოხვდება პირველი მსოფლიო ომის ფრონტის ხაზზე. მთავარ გმირს, ალბერტს განასახიერებს ახალბედა ჯერემი ირვინი. ფილმში ასევე მონაწილეობენ ემილი უოტსონი, პიტერ მულანი, დევიდ თეულისი და სხვები. ტრეილერის შემდეგ წაიკითხეთ ფილმის ოფიციალური სინოფსისი. ფილმი ეკრანებზე წლის ბოლოს გამოვა და ის წლევანდელი ოსკარის ერთ-ერთი მთავარი პრეტენდენტია.



ოფიციალური სინოფსისი:

"საბრძოლო ცხენი" იწყება ცხენის, სახელად ჯოის და მისი მწვრთნელის, ახალგაზრდა ალბერტის შესანიშნავი მეგობრობით. მას შემდეგ, რაც მათ ძალით დააშორებენ, სიუჟეტი მოგვითხრობს ცხენის არაჩვეულებრივი მოგზაურობის შესახებ, რომელიც ცვლის ყველას ცხოვრებას, ვისაც ამ პერიოდში შეხვდა: ბრიტანელი კავალერისტის, გერმანელი ჯარისკაცების, ფრანგი ფერმერისა და მისი შვილიშვილის. ცხენმა მოგზაურობის დროს გამოცადა პირველი მსოფლიო ომი თავისი მთელი სისასტიკით. სიხარულის და სევდის ოდისეა, ომის და მეგობრობის ისტორია.

 

 

Read More

სამი მუშკეტერი 3D / The Three Musketeers 3D - მეორე ტრეილერი

გამოვიდა პოლ ანდერსონის "სამი მუშკეტერის" მეორე ტრეილერი, რომელიც დაფუძნებულია ალექსანდრე დიუმას ამავე სახელწოდების უკვდავ რომანზე. როგორც ეს ორივე ტრეილერიდან ჩანს, ანდერსონმა გადაწყვიტა დიუმას რომანის ახალი, თანამედროვე თავისებური ხედვა წარმოგვიდგინოს. ორ წუთიანი ვიდეო ასახავს მფრინავ გემებს, საჰარო ბრძოლებს, რომელიც კარიბის ზღვის მეკობრეებს უფრო დაამშვენებდა, ბრძოლის უაზრო და სასაცილო მეთოდებს, მებრძოლ მილედის, და სხვ. მოკლედ ამ ფილმს 3D ექშენს უფრო ვუწოდებდი, ვიდრე ისტორიულს. თუმცა ისიც აღსანიშნავია, რომ ფილმი ძალიან ლამაზი ჩანს შესანიშნავი სპეც-ეფექტებით. რეჟისორის ჩანაფიქრმა და ხედვამ გამახსენა 2001 წლის ფილმი "მუშკეტერი", ჯასტინ ჩემბერსისა და ტიმ როტის მონაწილეობით, თუმცა იმედია სხვა ასპექტებში ახალი ეკრანიზაცია წინამორბედს უკან ჩამოიტოვებს.

ფილმში მონაწილეობენ ლოგან ლერმანი (დარტანიანი), მეთიუ მაკფადენი (ათოსი), რეი სტივენსონი (პორთოსი), ლუკ ევანსი (არამისი), მილა იოვოვიჩი (მილერი დე უინტერი), ჯუნო ტემპლი (დედოფალი ანა), კრისტოფ ვალზი (კარდინალი რიჩენიე), ორლანდო ბლუმი (ბუკინგემის ჰერცოგი) და სხვები. ფილმი არის აშშ-ის, ბრიტანეთის, საფრანგეთისა და გერმანიის ერთობლივი ნაწარმოები. მისი პრემიერა შედგება წელს, 14 ოქტომბერს 3-D ფორმატში.

Read More

Pixar-ის ახალი ფილმი "მამაცი" - ტიზერ ტრეილერი და სურათები

ცოტა ხნის წინ კინოეკრანებზე გამოვიდა პიქსარის ანიმაციური ფილმი, "მანქანები 2", რომლის ნახვის საშუალებაც 7 ივლისიდან მოგვეცემა კინო რუსთაველსა და ამირანში. ამავდროულად სტუდია განაგრძობს მუშაობას კიდევ ორ ფილმზე. პირველია "მონსტრების უნივერსიტეტი" (იხილეთ ჩვენი სტატია), მეორე კი "მამაცი" (Brave). ფილმის შექმნის პირველ ნაწილში რეჟისორი იყო ბრენდა ჩეპმენი, თუმცა შემდეგ ის მარკ ენდრიუსმა ჩაანაცვლა. ჩეპმენი ტიტრებში მოხსენიებული იქნება, როგორც თანარეჟისორი.

თავდაპირველად კინოსტუდიამ გამოაქვეყნა სურათის კონცეპტ–არტი (იხილეთ ის EW-ზე), ახლა კი ფილმის პოსტერი, პერსონაჟთა ფოტოები და რაც მთავარია ტიზერ ტრეილერი. მამაცი საკმაოდ განსხვავდება პიქსარის სხვა მულტფილმებისგან. ის არის პირველი ფილმი, რომელსაც მდედრობითი სქესის მთავარი პერსონაჟი ჰყავს, რომელიც არაოფიციალურად შეუერთდება დისნეის პრინცესათა რიგს. სხვა განსხვავებებს თავადაც აღმოაჩენთ ტრეილერის ნახვის შემდეგ.



ფილმის ოფიციალური სინოფსისი:

მოქმედება მიმდინარეობს შოტლანდიის მისტიკურ მთიანეთში, სადაც მერიდა არის მეფე ფერგუსისა (ბილი კონოლი) და დედოფალი ელინორის (ემა თომპსონი) სამეფოს პრინცესა. ურჩი ქალიშვილი და შესანიშნავი მშვილდოსანი, მერიდა ერთ დღესაც უგულვებელყოფს მიწის წმინდა ტრადიციას და არეულობას შემოიტანს სამეფოში. ყველაფრის გამოსწორების ცდისას, მერიდა პოულობს ექსცენტრიულ ბრძენ ქალს (ჯული უოლტერსი). მერიდას მისიაში ასევე ფიგურირს სამეფოს სამი ლორდი: ლორდი მაკგუფინი (კევინ მაკკიდი), ლორდი მაკინტოში (კრეიგ ფერგიუნსონი), და ლორდი დინგუოლუ (რობი კოლტრეინი).

"მამაცი" გამოვა 2012 წლის 22 ივნისს 3–D ფორმატში.

ფილმის ოფიციალური პოსტერი:

Read More

პირველი სურათები ჰობიტიდან; ევანჯელინა ლილი ელფს განასახიერებს

უკვე ტრადიაციად იქცა, ის რომ ჰობიტის ქასთინგის ყველა სიახლეს თავად რეჟისორი პიტერ ჯექსონი გვატყობინებს თავისი ფეისბუქის მეშვეობით. ამჯერად მან კიდევ ორი ახალი პერსონაჟის შესახებ გამოაქვეყნა ინფორმაცია. პირველია ვუდლენდელი ელფი, ტაურიელი, რომელსაც ჰობიტში შეასრულებს ევანჯელინა ლილი (დაკარგულები / Lost). ფილმის კიდევ ერთი ახალი მსახიობია ბარი ჰემფრიზი, რომელიც ჰობიტში გობლინთა მეფის როლს შეასრულებს. პიტერ ჯექსონის სრული წერილი ქასთინგის შესახებ იხილეთ ბმულზე.

სულ ცოტა ხნის წინ Entertainment Weekly-მ გამოაქვეყნა პირველი სურათები ფილმიდან, რომლებზეც გამოსახულია ბილბო ბეგინსი (მარტინ ფრიმენი) და გენდალფი (იან მაკკელენი). ასევე შეგვიძლია შევაფასოთ მაგიდასთან მჯდომარე რამდენიმე ჯუჯა, რომლებიც პირველ სურათში ჩანან. EW-მ ასევე გამოაქვეყნა ფოტო, რომელზეც რეჟისორი პიტერ ჯექსონი მარტინ ფრიმენთან ერთადაა გადაღებული გადასაღებ მოედანზე. სამივე სურათი უსათოუთ მოგაგონებთ ბეჭდების მბრძალებლის ტრილოგიას, განსაკუთრებით იან მაკკელენი, რომლის პერსონაჟიც ტრილოგიის შემდეგ დიდად არ შეცვლილა.

Read More

"ფორსაჟი 6"–ის გამოსვლის თარიღი

სულ ახლახანს Universal-მა გამოაცხადა "სიჩქარე და ფორსაჟის" მეექვსე ფილმის გამოსვლის თარიღი. ერთი კვირის წინ, ლას ვეგასში სტუდიამ პრომო პოსტერიც გამოაქვეყნა, სადაც მითითებული იყო მხოლოდ გამოსვლის წელი – 2013. დღეს კი უკვე ცნობილი გახდა რომ ფილმი, 2013 წლის გაზაფხულზე, 24 მაისს გამოჩნდება დიდ ეკრანებზე.

პროდიუსერებად ისევ ნილ ჰ. მორითსი და ვინ დიზელი მოგვევლინებიან. არც ჯასტინ ლი დათმობს რეჟისორის პოსტს და კვლავ ჩაიბარებს სიჩქარის ფრენჩაიზის გადაღებებს. Variety–ის ცნობით, მეექსვე ფილმისთვის დაბრუნდებიან მსახიობები ვინ დიზელი, პოლ უოლკერი და დუეინ ჯონსონი, ასევე "ფორსაჟი 5–ის" სცენარისტი კრის მორგანი. თუ გავითვალისწინებთ, იმას რომ ზოგადად "სიჩქარე და ფორსაჟი"   საკმაოდ წარმატებული პროექტი აღმოჩნდა და ბოლო ფილმმაც სტუდიას  კარგი შემოსავალი მოუტანა, ამიტომ გასაკვირიც არაა, რომ მის დასრულებას ჯერ არ აპირებენ და უახლოეს მომავალში შესაძლოა მისი არა ერთი, არამედ ორი და მეტი გაგრძელებაც კი ვიხილოთ.

Read More

"კაპიტანი ამერიკა: პირველი შურისმაძიებელი" - მეორე ტრეილერი

თავისუფლად შეიძლება ითქვას, რომ 2011 წელი ამერიკული კომიქსების სუპერ გმირებს ეკუთვნით. DC-იმ, როგორც მოსალოდნელი იყო თავი ვერ გამოიჩინა. მისი მწვანე ჩირღდანი არც თუ ისე კარგი ფილმი გამოდგა. რაც შეეხება მარველს, ის თავისი დიდების ზენიტს აღწევს და მისი კომიქსების ეკრანიზაცია როგორც მაყურებლების, ისე კინოკრიტიკოსების გულს იგებს. საკმაოდ წარმატებული აღმოჩნდა თორი, რომელიც Marvel Studios-ის ამბიციური პროექტის "შურისმაძიებლების" ერთ-ერთი წინაპირობაა. "შურისმაძიებლები" 2012 წლის ზაფხულში გამოვა და თორის გარდა ის გააერთიანებს პერსონაჟებს ფილმებიდან: "რკინის კაცი", "წარმოუდგენელი ჰალკი" და "კაპიტანი ამერიკა: პირველი შურისმაძიებელი". ამ უკანასკნელის შეფასება სულ მალე შეგვეძლება, მანამდე კი ტრეილერებით უნდა დავკმაყოფილდეთ.

თუ კაპიტანი ამერიკას პირველი ტრეილერი არც თუ ისე დიდ მოწონებას იმსახურებდა, მეორე ტრეილერი შთაბეჭდილებას ტოვებს, რომ ფილმი ერთ-ერთი საუკეთესო იქნება კომიქსების ეკრანიზაციებს შორის. ფილმი გამორჩეულია იმით, რომ მოქმედება არა თანამედროვე დროში ან მომავალში არამედ წარსულში, მეორე მსოფლიო ომის დროს ხდება. ფილმს ჰყავს კარგი მსახიობები. კრის ევანსი არაჩვეულებრივად ირგებს სტივ როჯერსის როლს. ასევე აღსანიშნავია ჰუგო ვივინგის "წითელი თავისქალა". ტრეილერი საკმაოდ მიმზიდველია ბატალური სცენებითა და ექშენით. აქვს როგორც წარსულის, ისე სამეცნიერო-ფანტასტიკის ელფერი, ამიტომ ნამდვილად ღირს მისი ნახვა.



ამას გარდა გამოვიდა ვიდეო, რომელიც რეჟისორი ჯო ჯონსტონი, პროდიუსერები, კომიქსის შემქმნელები და მსახიობი კრის ევანსი კაპიტანი ამერიკის ფარზე მოგვითხრობენ. ასევე საუბარია "რკინის კაცის" ორივე სერიის იმ მომენტებზე, რომელშიც ეს ფარი დომინირებს. ვიდეო მომზადდა ანტი-ვირუს Norton by Symantec სპონსორობით, ამიტომ გაფრთხილებთ, რომ ის შეიცავს უამრავ სარეკლამო კადრს, ინტერვიუებსა და ფილმის მომენტებს შორის.



დაუწერელ კანონად იქცა ის, რომ კომიქსზე გადაღებულ ყველა ფილმს და განსაკუთრებით კარგ ფილმს სჭირდება გაგრძელება. მართალია კაპიტანი ამერიკა ჯერ არ გამოსულა, მაგრამ უკვე ალაპარაკდნენ მის სეკველზე. სცენარისტები კრისტოფერ მარკუსი და სტივენ მაკფილი ყველაზე მნიშვნელოვნად მიიჩნევენ იმის გადაწყვეტას, თუ რომელ დროში განვითარდება მეორე ფილმის სიუჟეტი. მათი აზრით, ჯერ კიდევ შეიძლება წარსულის ისეთი ისტორიების გადაღება, რომელსაც ჯო ჯონსტონის ფილმი არ შეიცავს. აღსანიშნავია ისიც, რომ კაპიტანი ამერიკის გადაღებები ტაიმ სკვერზეც შედგა, სადაც თანამედროვე დროში კრის ევანსის და სემუელ ლ. ჯექსონის გმირები ერთმანეთს ხვდებიან.

 
























შეგახსენებთ, რომ ფილმი 22 ივლისს გამოვა დიდ ეკრანებზე. მასში, კრის ევანსთან ერთად, ასევე მონაწილეობენ ტომი ლი ჯონსი, ჰუგო უივინგი, ჰეილი ეტველი, სებასტიან სტენი, ტობი ჯონსი, დომინიკ კუპერი და სტენლი ტუჩი.

Read More

"საშიში მეთოდი" – პირველი ტრეილერი

გამოვიდა დევიდ კრონენბერგის ახალი ფილმის "საშიში მეთოდის" (A Dangerous Method) პირველი ტრეილერი, რომელიც დაფუძნებულია კრისტოფერ ჰემპტონის (ასევე ფილმის სცენარისტი) 2002 წლის პიესაზე "საუბრით განკურნება". სურათი მოგვითხრობს რეალურ ისტორიას დოქტორი კარლ იანგის (მაიკლ ფასბენდერი), მისი მასწავლებლის ზიგმუნდ ფროიდისა (ვიგო მორტენსენი) და იანგის რუსი პაციენტის საბინა შპილრეინის (კირა ნაითლი) ურთიერთობის შესახებ, როდესაც ეს უკანასკნელი მოსწავლესა და მასწავლებელს შორის ჩადგება. პირველმა ტრეილერმა უკვე ყველას კარგი შტაბეჭდილება შეუქმნა ფილმზე და დაგვარწმუნა ფასბენდერის, მორტენსენისა და ნაითლის შესანიშნავ შესრულებაში. ტრეილერს გასდევს ბეჭდების მბრძანებლისა და კრონენებერგის თითქმის ყველა ფილმის კომპოზიტორის, ჰოვარდ შორის მუსიკა.

მარცხნივ ზის ფროიდი, მარჯვნივ
კი იანგი

სურათი დაფუძნებულია რეალურ პიროვნებებზე, თუმცა რამდენად ზუსტად ასახავს ის მათ ურთიერთობას ფილმის გამოსვლის შემდეგ გავიგებთ. ფაქტია, რომ ზიგმუნდ ფროიდსა და კარლ იანგს საკმაოდ ხანგრძლივი ურთიერთობა აკავშირებთ. მიუხედავად იმისა, რომ მათი თეორიები ხშირად უპირისპირდება ერთმანეთს, მათ საკმაოდ ძლიერი ზეგავლენა მოახდინეს ერთმანეთის ნამუშევრებზე. ახლა რაც შეეხება იანგის რუს პაციენტ საბინა შპილრეინს, რომელიც შემდგომში ერთ–ერთი პირველი ქალი ფსიქოანალიტიკოსი გახდა. აქვე იკვეთება პირველი ქრონოლოგიური უზუსტობა. საბინა ციურიხში 1904 წელს მოხვდა ფსიქიატრუილ კლინიკაში, სადაც იმ დრის იანგი მუშაობდა და იქ 1905 წლამდე დარჩა, მაშინ როდესაც ფროიდი პირველად იანგს ამ ფაქტის შემდეგ, 1907 წელს შეხვდა. ამ სამეულის ურთიერთობა კი ოდნავ მოგვიანებით იწყება.

სურათის მთავარ ხიბლს მაინც მსახიობები წარმოადგენს. მაიკლ ფასბენდერს, რომელმაც წელს უკვე ითამაშა "იქს–ადამიანები: პირველი კლასში", ეს ფილმი საბოლოოდ დაეხმარება პოპულარობის მოპოვებაში. სავსაბით სავარაუდოა, რომ ფილმი და მსახიობები წელს ოსკარისთვისაც იბრძოლებენ.

Read More

"აგვისტოს 5 დღე / 5 Days of August" - განხილვა

ეს იმ გამონაკლის რევიუთაგანია, რომლის დაწყებაც არ მიწევს იმის მოყოლით, თუ რომელ კინოთეატრს ვესტუმრე. რენი ჰარლინის "აგვისტოს 5 დღის" პრემიერა 5 ივნისს კინო რუსთაველში შედგა, ჩვენ, ჩვეულებრივ მოკვდავებს კი მას შემდეგ შეგვეძლო ის შეგვეფასებინა, თუმცა ამას მნიშვნელოვნად შეუშალა ხელი ერთმა ფაქტმა. პროდიუსერებმა გადაწყვიტეს ბრიტანეტში ფილმი მალევე გამოეშვათ DVD-ზე (13 ივნისი). გამომდინარე იქიდან, რომ საქართველოში პირატობა ყვავის, ფილმის DVDrip მალევე შეაღწევდა ყველა ქართველის სახლში, თანაც არა გახმოვანებული, არამედ ორიგანალი.

"აგვისტოს 5 დღე" მოგვითხრობს ამერიკელი ჟურნალისტის და მისი ოპერატორის შესახებ, რომლებიც 2008 წლის რუსეთ-საქართველოს ომის დროს ჩამოდიან მიმდინარე მოვლენების გასაშუქებლად. ისინი ჯიუტად ცდილობენ ცხელ წერტილებში ჩასლვას, და იმ მასალის გადარჩენას, რომელზეც ომის დაწყების და რუსების მიერ მოსახლეობის აწიოკების კადრებია ასახული. მათ ეხმარებიან ქართველი ჯარისკაცები, რომელთაც კაპიტანი რეზო ავალიანი ხელმძღვანელობს, ასევე თარჯიმნობას უწევს ახალგაზრდა ქართველი გოგონა.

ფილმის ყველაზე დიდი სისუსტე არის სცენარი. მთელი სიუჟეტი ორ ნაწილად იყოფა, რომელთაც ერთმანეთთან პირდაპირი კავშირი არ აქვთ. ისტორია, რომელიც პრეზიდენტ მიხელ სააკაშვილს და მის რეზიდენციაში მიმდინარე მოვლენებს მიუყვება, გარკვეულწილად პოლიტიკურ ვითარებას გვაცნობს. თუმცა, ამ ნაწილისთვის დათმობილი დრო (სატელევიზიო გამოსვლები და თათბირები) ნაკლებად იძლევა პოლიტიკაში გარკვევის საშუალებას და მხოლოდ ზედაპირულ წარმოდგენას გვიქმნის. სიუჟეტის მეორე ხაზი, ამერიკელ ჟურნალისტს თავგადასავალს ასახავს, იმას რაც მას ერაყში გადახდა, რატომ ჩამოვიდა საქართველოში და სხვა. ძალიან მარტივად და ბანალურად მეჩვენება მათი, როგორც საკუთარი პროფესიის ერთგული და სიმართლისათვის თავდადებული ადამიანების, 5 დღიანი ქართული ისტორია. მთელი სიუჟეტი ზედმეტად სწრაფად და არეულად ვითარდება, თითქოს ლოგიკური გადასვლები აკლია.

"აგვისტოს 5 დღე" არის ექშენის ჯანრის საომარი ფილმი. მასში ნაჩვენებია სამხედრო ოპერაციები, როგორც ერაყში, ისე საქართველოში. დიდი ყურადღება ეთმობა საჰაერო თავდასხმებს, აფეთქებებსა და კვამლში გახვეულ ადგილებს. როგორც ჰარლინის ინტერვიუში ამოვიკითხე, მასში აღფრთოვანება გამოიწვია იმ ფაქტმა, რომ მის განკარგულებაში დაახლოებით 80 ტანკი, 8 ვერტმფრენი, სამი რეაქტიული თვითმფრინავი და ორი–სამი ათასი ჯარისკაცი. მანაც არ დაიზარა და ყველაფერი ეს თავის ფილმში აჩვენა, ამიტომაა, რომ ხშირად ათეულობით ტანკი ერთ კადრში ჩნდება. მიუხედავად ყველაფრისა ფილმი არ გამოირჩევა საუკეთესო ეფექტებით. შთაბეჭდილება დამრჩა, რომ რეჟისორი შეეცადა ფილმი დრამის ელემენტებითაც გაეჟღინთა. ის ცდილობს დაგვანახოს ომის სისასტიკე, მისი მსხვერპლი, რომლებიც უდანაშაული ადამიანები გახდნენ, იქ მყოფთა ტანჯვა, ახლობელებისა და საკუთარი მიწის დაკარგვით გამოწვეული. ეს ყველაფერი კი იმ რეალურ ფაქტებზე დაყრდნობით განახორციელა, რომელსაც ფილმის დასასრულს ამ ომში მხილველი ადამიანები თავად გვიყვებიან. ამის მიუხედავად მაინც ექშენმა გადასძალა. ფილმის რომანტიკული მხარეც კი ნაკლებად მომზიდველია, გაცილებით უფრო ამაღელვებელი სასიყვარულო ისტორია შეიძლებოდა განვითარებულიყო.

რასაც "აგვისტოს 5 დღეს" ვერ დავუწუნებ ესაა ოპერატურაა, ფილმის გარკვეული ნაწილი ჯურნალისტის კამერითაა ასახული და თავისებურ ეფექტს ქმნის. მუსიკა ნადვილად არ ახდენს შთაბეჭდილებას, ტრევორ რაბინის ნამუშევარი არც ყურადღებას იქცევს და არც რაიმე განსაკუთრებულს სძენს ფილმს.

რაც შეეხება მსახიობთა ოსტატობას. რადგანაც ჩვენთან ყველაზე პოპულარული ენდი გარსიაა, ჯერ მასზე მოგახსენებთ. ვერ ვიტყვი რომ მან იმედი გამიცრუა. ჩემი აზრით, ის მხოლოდ პოლიტიკურ მოსაზრებებს ახმოვანებდა და მეტი არაფერი. ცდილობდა ყოფილიყო ემოციური, მაგრამ განსაკუთრებულ ემოციას სულაც არ აღძრავდა. რუპერტ ფრენდის გმირი ისეთია როგორიც უნდა ყოფილიყო, რიჩარდ კოილი კი უბრალოდ ახალისებს ფილმს. ჩემი აზრით შრიკის გმირი საერთოოდ ვერ ერგება თავის როლს. ის ნაკლებად ჰგავს ქართველს და მისი ემოციებიც ძალიან ხელოვნურია. ფილმში ქართველ მსახიობებსაც ჰქონდათ საკმაოდ მნიშნელოვანი როლები, თუმცა მეგონა ისინი მხოლოდ ეპიზოდებში გამოჩნდებოდნენ. გასაკვირიც არაა, რომ თავიანთი წარმოშობის გამო მიშა გომიაშვილი და ანა იმნაძე უფრო კარგად გადმოსცემდნენ ომისგან გამოწვეულ განცდებსა და ტკივილს. დინ კეინი, რომელიც პრეზიდენტის ამერიკელ მრჩეველს ანსახიერებს მხოლოდ ორი რამისთვისაა ფილმში, ერთი რომ ამერიკის მთავრობის გადაწყვეტილებები გაახმოვანოს და მეორე, რომ პრეზიდენტმა და მინისტრებმა ინგლისურად ისაუბრონ. აქედან გამომდინარე ზოგ კადრებში უბრალოდ ზედმეტიცაა.

"აგვისტოს 5 დღე" ცდილობს ენის ბარიერს გაუმკლავდეს. ფილმში ჟღერს როგორც ინგლისური, ისე ქართული და ამავდროულად რუსული დიალოგები. ზემოთ მოგახსენეთ როგორ მოაგვარეს ეს პრობლემა პრეზიდენტის რეზიდენციაში გამართულ საუბრებთან დაკავშრებით. რაც შეეხება უცხოელთა მიერ განსახიერებულ სხვა ქართველებს, ისინი უბრალოდ ქართულად საუბრობენ, თუმცა საშინელი აქცენტით. ეს ბევრს არაფერს ცვლის, თუმცა კონტექსტიდანაა ამოვარდნილი პრეზიდენტის სატელევიზიო გამოსვლები (შეგვიძია გამართლება მოვუძებნოთ, იმით რომ ნათარგმნია) და რაც ყველაზე მნიშვნელოვანია, პარლამენტის წინ შეკრებილი ხალხისადმი წარმოთქმული სიტყვა.

"აგვისტოს 5 დღის" ფინელი რეჟისორი რენი ჰარლინი უფრო მეტად ცნობილია ექშენის ჟანრის ფილმების გადაღებით. 1990 წელს მას ჩააბარეს იმ დროისთვის ერთ-ერთი ყველა მაღალ ბიუჯეტიანი ფილმი "კერკეტი კაკალი 2". სამაგიეროდ ასეთი წარმატებული არ ყოფილა მისი შემდგომი კარიერა, 1995 წლის ფილმი "Cutthroat Island" გინესის რეკორდების წიგნშია შესული, როგორც ყველა დროს ყველაზე დიდი საშემოსავლო კრახი კინოს ისტორიაში, რომელმაც კინოკომპანია Carolco Pictures-იც გააბანკროტა. ფინელი რეჟისორი ჯამში სულ ოთხჯერ იქნა ნომინირებული ოქროს ჟოლოზე ყველაზე ცუდი რეჟისორის კატეგორიაში. ჰარლინს თავისი ბლოკბასტრების გამო ხშირად ადარებენ ამერიკელ რეჟისორ მაიკლ ბეის (ტრანსფორმერები). თუმცა არ მეგონა თუ აგვისტოს 5 დღის ნახვის შემდეგ მეც აღმოვაღენდი მსგავსებას. კერძოდ კი ბეის ფილმთან "პერლ ჰარბორი". ორივე ფილმში ომის ისტორიაა გადმოცემულია ანალოგიურად სხვადასხვა მხრიდან. მის სიუჟეტსაც ორი ხაზი გააჩნია, ერთი პრეზიდენტ რუზველტისა და თეთრი სახლის პოზიციას გამოხატავს, ხოლო მეორე ახალგაზრდა მფრინავებისა და მედდების ცხოვრებაზე მოგვითხრობს. ამ ყველაფერს კი იაპონელების მიერ პერლ ჰარბორის დაბომბვა აერთიანებს. საბოლოო ჯამში ფილმი ასახავს იმ სულისკვეთებას, რომლითაც ახალგაზრდები მტრის წინააღმდეგ იბრძვიან საკუთარი ქვეყნის დასაცავად, ასევე ადამინების სიკვდილის გამოწვეული ტრაგედია და სიყვარულის ისტორია. მართალია კინოკრიტიკოსები არც პერლ ჰარბორს წყალობენ, მაგრამ მისი ნახვისას ამერიკელი ხალხის ტკივილის უფრო განვიცადე, ვიდრე აგვისტოს 5 დღის შემდეგ ჩემი თანამემამულეების.

ამ ფილმის შეფასების დროს მგონია, რომ ზედმეტად სუბიექტური ვარ. ის რაც თითოელმა ქართველმა და მათ შორის მეც აგვისტოს იმ დღეების დროს განვიცადეთ, საერთოდ ვერ დაიტია ორსაათიანმა ჰოლივუდურმა ფილმმა. ერთადერთი რისი თქმაც რენი ჰარლინის ნამუშევარმა შეძლო ეს იყო ის, თუ როგორ არ აინტერესებდა მსოფლიოს და განსაკუთრებით ამერიკას ერთი პატარა ქვეყნის ისტორია და როგორ უგულვებელყოფდა მცირერიცხოვანი ერის ტკივილს. საინტერესოა ეს ფილმი, რამდენად გულშიჩამწვდომი იქნება უცხო ქვეყნის აუდიტორიისთვის. ხშირად საუბრობენ ამ ფილმის პროპაგანდულ ხასიათზე. რა თქმა უნდა სავსებით მოსალოდნელია, რომ ფილმის მსოფლიოს ეკრანებზე გამოსვლის შემდეგ ხალხი მეტს შეიტყობს აგვისტოს სისხლიანი დღეების შესახებ. რაც არ უნდა იყოს ამას მაშინ გავიგებთ, როცა ამ ფილმის ამერიკულ რეცენზიები დაიწერება.

საბოლოო შეფასება

1.5/5

თქვენ რას ფიქრობთ ფილმზე?


მოგვიწონეთ Facebook-ზე

Read More

აკადემია ცვლის ოსკარის წესებს

2009 წლის 24 ივნისს, კინემატოგრაფიულ ხელოვნებათა და მეცნიერებათა აკადემიის მაშინდელმა პრეზიდენტმა, სიდ გენისმა პრეს-კონფერენციაზე გამოაცხადა, რომ ოსკარის 82-ე ცერემონიაზე საუკეთესო ფილმის კატეგორიისთვის 5-ის ნაცვლად 10 ნომინანტი იბრძოლებდა. მისი აზრით, ეს ცვლილება აკადემიას საშუალებას მისცემდა დაეფასებინათ ის ფანტასტიური ფილმები, რომლებიც სხვა კატეგორიებში ხდებოდნენ ნომინირებულნი, თუმცა მთავარი ჯილდოსთვის ბრძოლას ეთიშებოდნენ. მაშინ ეს ცვლილება არაოფიციალურად დაუკავშირეს კრის ნოლანის ფილმს, "ბნელი რაინდს", რომელიც ოსკარზე არ ყოფილა ნომინირებული ოსკარის მთავარ ნომინაციაზე.

ცოტა ხნის წინ აკადემიამ გაავრცელა პრეს-რელიზი დაჯილდოების წესებში შეტანილი ცვლილებების შესახებ. ცვლილების უმნიშვნელოვანი ნაწილი კვლავ "საუკეთესო სურათის" კატეგორიას შეეხო. ამიერიდან ნომინირებულ ფილმთა რაოდენობა 5-იდან 10-მდე იმერყევებს, ანუ ნომინაციების გამოცხადებამდე პუბლიკას ნომინანტთა ზუსტი რაოდენობაც არ ეცოდინება. აკადემია ამ გადაწყვეტილებამდე მივიდა მას შემდეგ, რაც გამოიკვლია გასული დეკადის დაჯილდოებები და დაასკვნა, რომ 2001-2008 წლებში ასეთ აღიარებას სხვადასხვა რაოდენობის ფილმები იმსახურებდნენ.

ცვლილებები ასევე შეეხო კიდევ რამდენიმე ნომინაციას, მათ შორის საუკეთესო ანიმაციურ ფილმს. აქამდე ყოველ წელს აკადემია ამ ნომინაციის აქტივაციას ახდენდა, თუმცა ეს წესი ახლა გაუქმდა და ნომინაციაც დაჯილდოების მუდმივი კატეგორია გახდა. ამის მიუხედავად შენარჩუნდა წლის განმავლობაში ანიმაციური ფილმების მინიმალური რაოდენობა - 8. ნომინანტთა რიცხვი ამ კატეგორიაშიც მერყევი იქნება. თუ 8-იდან 12-მდე ანიმაცია გამოვიდა, მათგან 2 ან 3 იქნება ნომინირებული, თუ 13-იდან 15-მდე, ნომინანტთა მაქსიმალური რიცხვი 4-ს შეადგენს, თუ 16 ან მეტი, ნომინირებული შეიძლება იქნას მაქსიმუმ 5 ფილმი.

შეგახსენებთ, რომ ოსკარის ნომინაციები გამოცხედდება 24 იანვარს, თავად ცერემონია კი გაიმართება 26 თებერვალს.

Read More

"კოვბოები და უცხოპლანეტელები" - ვიდეო ფილმის შემქმნელთა კომენტარებით

ფილმით "კოვბოები და უცხოპლანეტელები" რეჟისორი ჯონ ფავრო სამეცნიერო ფანტასტიკისა და ვესტერნს ერთ პროექტში მოაქცევს. წარმატების შემთხვევაში კი, რაც სავსებით მოსალოდნელია, ის ამგვარ უცნაურ და ამავდროულად სარისკო ჟანრს პოპულარიზაციას გაუწევს. უკვე გამოსული ტრეილერების შემდეგ უფრო მარტივი გახდა იმის წარმოდგენა, როგორ შეებრძოლებიან ცხენზე ამხედრებული ადამიანები მფრინავი ხომალდებით მოსულ, მტრულად განწყობილ უცხოპლანეტელებს. ცოტა ხნის წინ გავრცელებულ ვიდეოში ფილმის შესახებ საკუთარ აზრს გამოთქვამენ პროდიუსერები სტივენ სპილბერგი და რონ ჰოვარდი, სცენარისტები რობერტ ორსი და ალექს კურცმანი, ასევე რეჟისორი ჯონ ფავრო. ვიდეო არ შეიცავს სპოილერებს, ის მთლიანად ფოკუსირებულია გადაღების პროცესზე და ფილმის შემქმნელების მოსაზრებებზე.

"კოვბოები და უცხოპლანეტელები" დიდ ეკრანებზე 29 ივლისს გამოდის და 2D ფორმატშია. ფილმზე მეტი ინფორმაციის მისაღებად გაეცანით ოფიციალურ სინოპსისს და იხილეთ შემდეგი ვიდეო.



ქვემოთ იხილეთ ფილმის ოფიციალური სინოფსისი:

1873. არიზონა. მეხსიერება დაკარგული უცხოელი შემთხვევით აღმოჩნდება Absolution–ის ქალაქში. წარსულის ერთადერთი გადმონაშთი არის მხოლოდ საიდუმლოებით მოცული იარაღი–ბორკილი, რომელიც მას ხელზე უკეთია. უცხოელი აღმოაჩენს, რომ ქალაქის მაცხოვრებლებს არ უყვარს უცნობები და ქუჩებში ნაბიჯსაც კი ვერავინ დგამს პოლკოვნიკი დოლარჰაიდის ნებართვის გარეშე. ეს არის ქალაქი, რომელიც შიშში ცხოვრობს.

მაგრამ ქალაქს საფრთხე უმუქრება, როდესაც მას ციდან მოსული უცხოპლანეტელთა რასა ესხმის თავს. მაშინ კი უცხოელი, რომელსაც ზურგი შეაქციას მათი გადარჩენის ერთადერთი იმედი ხდება. როდესაც ის ნელნელა იწყებს თავისი წარსულის გახსენებას, ხვდება, რომ მან იცის საიდუმლო, რომელიც ქალაქს უცხოპლანეტელებთან წინააღმდეგ ბრძოლაში მისცემს შანს. მოუხელთებელი მოგზაურის ელას დახმარებით, ის ყოფილი მოწინააღმდეგეებისაგან – ქალაქის მაცხოვრებლების, დოლარჰაიდისა და მისი ხალხის, კანონგარეშეებისა და აპაჩეებისაგან – შეკრებს რაზმს და საერთო მტრის წინააღმდეგ გაერთიანებულები დაიწყებენ ბრძოლას გადარჩენისათვის.

ჯანრი: ექშენ თრილერი
მსახიობები: დენიელ კრეიგი, ჰარისონ ფორდი, ოლივია ვაილდი, სემ როკველი, ადამ ბიჩი, პოლ დანო, ნოა რინჯერი
რეჟისორი: ჯონ ფავრო
სცენარი: რობერტო ორსი & ალექს კურცმანი & დეიმონ ლინდელოფი
პროდიუსერები: ბრაიან ბრეიზერი, რონ ჰოვარდი, ალექს კურცმანი,რობერტო ორსი, სკოტ მიტჩელ როზენბერგი

Read More

კრისტოფერ ნოლანი და დევიდ ფინჩერი "სიცოცხლის ხის" შესახებ

ტერენს მალიკის "სიცოცხლის ხე" ყველასგან განსხვავებული ფილმი გამოდგა. მან განავითარა ახლებური, უფრო ფილოსოფიური მიდგომა, რომელიც კადრების უჩვეულო სილამაზით გააგვირგვინა. თუმცა ამის მიუხედავად ფილმმა ურთიერთსაპირიპირო ემოციები გამოიწვია მაყურებელში, ზოგადად კინოკრიტიკოსების გული კი ნამდვილად მოიგო. დღეს უკვე ჩვენთვის კარგად ნაცნობი რეჟისორები კრისტოფერ ნოლანი და დევიდ ფინჩერი აფასებენ მალიკისეულ ხედვას, რეჟისორის გავლენას მათ ნამუშევრებზე, მსახიობთა შესრულებას  და სხვა. ეს მოსაზრებები ყველა კინომოყვარულისათვის საინტერესო იქნება, ამიტომ მოისმინეთ ამ ორი რეჟისორის მოსაზრებები "სიცოცხლის ხის შესახებ". ასევე იხილეთ ჩვენი რეცენზია.

Read More

კრისტიან ბეილმა შესაძლოა არონოვსკის "ნოეში" ითამაშოს

დარენ არონოვსკი გეგმავს გადაიღოს ფილმი ბიბლიურ პერსონაჟ ნოეზე. მან სურვილი გამოთქვა, რომ მთავარი როლი კრისტიან ბეილმა შეასრულოს. Vulture–ის ცნობით ოსკაროსან მსახიობს ნოეს განსახიერება შესთავაზეს. ფილმის ბიუჯეტი 130 მილიონს შეადგენს. თუ ბეილმა თანხმობა განაცხადა, მაშინ არონოვსკის პოზიციები საპროდიუსერო კომპანიებთან უფრო გამყარდება. თავიდან ფილმი 20th Century Fox–ის პატარა კომპანია New Regency–ის უნდა დაეფინანსებინა, თუმცა ამხელა ბიუჯეტიან ფილმს ვერ გასწვდა, ამიტომ ახლა Paramount, Summit და Fox იქნებიან პროექტის თანადამფინანსებლები.

ბეილი ამჟამად დაკავებულია კრისტოფერ ნოლანის "ბნელი რაინდის აღზევების" გადაღებებით. ამის შემდეგ ის მონაწილეობას მიიღებს ფილმში "უკანასკნელი ფოტოგრაფი", რომელშიც ასევე თამაშობს შონ პენი. ბეილი შეასრულებს კორესპონდენტის როლს. ავღანეთში ამერიკელების ერთ–ერთი თავდასხმის შემდეგ ის ერთადერი გადარჩენილი აღმოჩნდება. ამ ფილმის გადაღებები დაიწყება მაშინვე, როგორც კი ბეილი ბეტმენის მესამე ფილმზე მუშაობას დაასრულებს, თუმცა თუ ის ნოეს განსახიერებას დათანხმდება, მაშინ სურვილისამებრ შეძლებს ჯერ არონოვსკის ფილმით დაკავდეს.

რეჟისორისთვის  ხელსაყრელია კრისტიან ბეილის მსგავსი მსახიობი მთავარ როლში, განსაკუთრებით მაშინ როცა ფილმი რელიგიური ხასიათისაა და წინასწარ არასდროს იცი როგორ მიიღებს მას მაყურებელი. დარენ არონოვკისთვის ეს გარკვეულ წილად რისკსაც წარმოადგენს. ფილმი ბიბლიურ პერსონაჟზე, თანაც "შავი გედის" რეჟისორის ხედვით შექმნილი მას არც აღიარებას მოუტანს და უფრო კი მსჯელობისა ან გაკიცხვის საგანი გახდება. მისი ინტერვიუდან ჩანს, რომ რაღაც მიზეზების გამო რეჟისორი ძალიანაა დაინტერესებული გმირის ხასიათით. ის თავად დაწერს სცენარს ფილმისთვის, რომელსაც შემდეგ ჯონ ლოგანი (ავიატორი) გადაწერს.

აღსანიშნავია ისიც რომ ბოლო დროს ბეილი წვერით და გრძელი თმით საკმაოდ წააგავს არონოვსკის "ნოეს" გრაფიკულ გამოსახულებას, ამიტომ აქვე შემოგთავაზებთ ამ გრაფიკული ნოველის ტრეილერს:

Read More

"სიცოცხლის ხე" – განხილვა

მართალია საქართველოს კინოთეატრებში მაყურებელთა ყურადღება სხვა ფილმებისკანაა მიმართული, თუმცა ტერენს მალიკის ახალი ფილმის ჩვენება მაინც არავის დავიწყებია, ასე რომ ხუთშაბათს, 9 ივნისს კინოთეატრ რუსთაველში ფილმ "სიცოცხლის ხის" პრემიერა შედგა. მეც საქართველოს ბანკის Facebook-ის ტრივია-კონკურსის წყალობით მას არ გამოვაკლდი. მართალია ფილმი მსოფლიოს მასშტაბით ფართო გაქირავებაში არ გამოსულა, მაგრამ ის საკმაოდ დადებითად შეაფასეს კანის 64-ე კინოფესტივალზე და ოქროს პალმის რტოც მიაკუთვნეს.

სანამ კონკრეტულად "სიცოცხლის ხეს" განვიხილავდე, რამოდენიმე სიტყვით რეჟისორ ტერენს მაკილზე მოგახსენებთ. 67 წლის მალიკის სარეჟისორო ნამუშევართა რაოდენობა საკმაოდ მწირია. მას გააჩნია განსაკუთრებული ხედვა და ბუნებისადმი გამორჩეული დამოკიდებულება, რაც ნათლად გამოიხატა მის წინა ფილმში "ახალი სამყარო". 1998 წელს კი ის ამერიკის კინოაკადემიამ წარადგინა ოსკაზე როგორც საუკეთესო რეჟისორის, ისე საუკეთესო სცენარისტის ნომინაციაში ფილმით "ვიწრო წითელი ხაზი".

ამჯერად მალიკი არ დასჯერდა ბუნების საოცარ კადრებს და გადაწყვიტა ახალ სცენარში მთელი სამყარო მოეცვა, ხილულიც და უხილავიც, დასაბამიდან ჩვენს დრომდე. ეს ყველაფერი კი ერთი ამერიკული ოჯახის ისტორიისა და ტრაგედიის შემავსებელ ნაწილად აქცია. ძირითადი მოქმედება ვითარდება 50-იანი წლების ტეხასში, პატარა ქალაქში, სადაც ახალგაზრდა მისტერ და მისის ო'ბრაიანები ერთი შეხედვით ბედნიერად ცხოვრობენ. მათი სამი შვილი ჩვეულებრივი რუტინული ცხოვრებით იზრდება დიქტატორი მამისა და მზრუნველი დედის გარემოცვაში. მისტერ ო'ბრაიანი (ბრედ პიტი) მკაცრი და მომთხოვნი ადამიანია. მისი სახით ფილმი გვიხსნის იმ ადამიანის ფსიქოლოგიას, რომელიც თავისი ბუნებით ეგოცენტრისტია, თუმცა წარუმატებლობის გამო, მისი ცხოვრება ემსგავსება გაუთავებელ სინანულს, იმაზე თუ რისთვის უნდა მიეღწია, რას იმსახურებდა და რა ვერ მიიღო. დროთა განმავლობაში მის გულს ბოღმა და შური ავსებს. ბრედ პიტი მართლაც რომ განსაკუთრებულია. ის ასეთი სახასიათო გმირებით სულაც არაა გათამამებული, ამიტომ იშვიათად ეძლევა საშუალება თავისი ნიჭი წარმოაჩინოს. მისის ობრაიანი (ჯესიკა ჩესტეინი) მოსიყვარულე დედაა, რომელიც მეუღლეს იშვიათად ეწინააჭმდეგება. ვფიქრობ ჩესტეინი საუკეთესო არჩევანია, რადაგნ ძალიან უხდება ამ როლს. სამივე ძმა, განსაკუთრებით კი უფროსი ჯეკი დაძაბული ოჯახური ურთიერთობის მსხვერპლი ხდება. გამუდმებული აკრძალვები და ბრძანებები მის სულს აფორიაქებს, ცდილობს წინააღმდეგობა გაუწიოს მამას, თუმცა დროთა განმავლობაში მისდამი ურთიერთ საპირისპირო გრძნობებს განიცდის, უყვარს და თან ეზიზღება, უფროდაუფრო ემსგავსება მას და აკეთებს, იმას, რასაც ვერ იტანს. აღფრთოვანებას იწვევს ჰანტერ მაკკრეკენი, რომელიც ახალგაზრდა ჯეკს განასახიერებს. ის თავისი მოძრაობის მანერით თუ სახის გამომეტყველებით სრულად ითავისებს მარტოსული და უბედური ბიჭის ტრაგიზმს. რასაც ვერ ვიტყვით შონ პენზე. მალიკმა მას მცირე როლი მისცა ფილმში, რაც რეალურად მის ჯეკთან გაიგივებას ართულებს და დიდი დატვირთვაც არ აქვს. შთაბეჭდილება მრჩება, რომ რეჟისორს უბრალოდ ვარსკვლავი უნდოდა ფილმში და შონ პენიც ნაცნობობის გამო დასთანხმდა.

ტერენს მალიკის ფილმი საკმაოდ ამბიციურია. მის მიერ დაწერილი სცენარი საკმაოდ სულისშემძვლელი და რეალურია. სიცოცხლის ხე არა მიუყვება მხოლოდ ისტორიის მთავარ ხაზს. როგორც ზემოთ ავღნიშნე, ის მთელ სამყაროს მოიცავს. ფილმის ერთ-ერთი მამოძრავებელი თემა კი სიცოცხლისა და სიკვდილის საკითხია. რა თქმა უნდა ბავშვები სიკვდილს პირისპირ არასდროს ეჯახებიან, ასეთი თემებისგან მათ მშობლები იცავენ, თუმცა დადგება დრო, როცა ყველა მოხვდება ისეთ სიტუაციაში, როცა ფიქრს დაიწყებს სიკვდილზე. ჯერ თანატოლის, შემდეგ ძმის სიკვდილმა ჯეკსაც უმრავი კითხვა გაუჩინა. სიცოცხლესა და სიკვდილს ურთიერთმიმართებას, მთელ ამ ფილოსოფიას რეჟისორი სამყაროში ეძებს, სწორედ ამიტომ ფილმის დასაწყისში ეს ძიება თვითონ სამყაროს დაბადებასთან გვაბრუნებს. დიდი აფეთქება, სიცოცხლის წარმოშობა დედამიწაზე, დინოზავრების ხანა... ეს დაახლოებით 25 წუთიანი ულამაზესი კადრების მთელი წყობაა, რომელიც ერთდროულად Discovery-ის ან National Gographic-ის დოკუმენტურ ფილმს უფრო მოგაგონებს ვიდრე მხატვრულს.

პირადად ჩემში ამგვარი კონტრასტული სცენარის გარდა აღფრთოვანება იწვევს, გადაღების სტილი და მუსიკა. მდინარეების, უდაბნოების და ზოგადად ბუნების ასახვის შესახებ საუბარიც არაა საჭირო, რაც შეეხება თითოეულ კადრს, მოძრავი კამერა ტრიალებს მისის ო'ბრაიანის ყოველ მოძრაობასთან და ბზრიალთან ერთად, მიჰყვება ეზოში და სახლში მორბენალ და მოთამაშე ბავშვებს. კადრები ქალაქში კი მთლიანად ქვემოდანაა გადაღებული. საკმაოდ სიტყვაძუნწი ფილმი დიალოგების დანაკლის მუსიკით გვივსებს, რაც ფილმის ყველაზე დიდი ღირსებაა. ამასთანავე მალიკის სიცოცხლის ხე სარეჟისორო სტილით, დიალოგების ნაკლებობით, კლასიკური მუსიკის გამოყენებით ძალიან ჰგავს სტენლი კუბრიკის "2001: კოსმოსური ოდისეას".



მართალია ეს ფილმი მე ძალიან მომეწონა, თუმცა კინოთეატრში მყოფმა სხვა მაყურებლებმა მისი დასრულებისას შვებით ამოისუნთქეს და ირონიული სიცილით დატოვეს იქაურობა. ფილმის ნელი ტემპი ბევრისთვის (განსაკუთრებით ექშენს მიჩვეული ადამიანებისათვის) შეიძლება ძალიან მოსაწყენი აღმოჩნდეს.

საბოლოო შეფასება

4/5

თქვენ რას ფიქრობთ ფილმზე?


მოგვიწონეთ Facebook-ზე

Read More

აგვისტოს 5 დღე / 5 Days of August - გადაღებები

მოგეხსენებათ "აგვისტოს 5 დღის" გამოსვლამდე ყველას ხშირად გვესმოდა ის აზრი, რომ ფილმი მთელ მსოფლიოს დაანახებდა ომის რეალურ მიმდინარეობას. მეც დავინტერესდი თუ რა იწერება "აგვისტოს 5 დღის" შესახებ უცხოურ ვებგვერდებზე, თუმცა სიმართლე გითხრათ მნიშვნელოვანი ნამდვილად ვერაფერი ვიპოვე. სამაგიეროდ აღმოვაჩინე ერთი საინტერესო პოსტი, რომელიც ფილმის ხმის შემრევმა (sound mixer) გამოაქვეყნა www.soundandpictureonline.com-ზე. პოსტი საკმაოდ დიდია მოცულობით და ძირითადად საუბარია ტექნიკურ საკითხებზე, მაგრამ მისი ნაწილი ფილმის გადაღებებს ეძღვნება. შევეცადე რაც შეიძლება ზუსტად მეთარგმნა.

შემოქმედებითი გუნდის ქართველი წევრების შესახებ
"...გადაღებებზე წამოსვლამდე დაველაპარაკე პოლ ლედფორდს, (ის მუშაობდა ხმის შერევაზე რენის ბოლო ფილმში "12 რაუნდი") რომელმაც მითხრა, რომ რენისთან მუშაობა იქნებოდა რთული, მაგრამ სასიამოვნო. ჩემმა boom operator-მა რიჩარდ ბალოკმა და მე მალევე აღმოვაჩინეთ, რომ რენი ჰარლინთან მუშაობა ზუსტად ასეთი იქნებოდა. მისი მოთმინება თარგმნის პრობლემებსა და ადგილობრივი შემოქმედებითი ჯგუფის შეზღუდულ გამოცდილებასთან დაკავშირებით იყო შესანიშნავი."

ნინო თევდორაშვილი

"ჩვენი utility person (ხმის შემრევის და boom operator-ის ასისტენტი), ნინო თევდორაშვილი იყო ადგილობრივი და მიუხედავად იმისა, რომ ისწავლა ხმის შერევა უნივერსიტეტში და ასევე ნამუშევარი ჰქონდა რამდენიმე პატარა პროექტზე, არასდროს უმუშავია "აგვისტოს 5 დღის" მსგავს ფილმზე... მან შესანიშნავი სამუშაო გასწია, თუმცა ისევე როგორც გუნდის სხვა ქართველი წევრები, ისიც ხშირად იბნეოდა მისთვის ძალიან "პირადი" ფილმის გადაღებების ყურებისას."

გადაღებების შესახებ
"ვფიქრობ საინტერესო იყო გადაღება ქვეყანაში, რომელსაც სრულიად არ აქვს გადასაღები ინფრასტრუქტურა."

სტალინის მოედანი, გორი

"საბოლოოდ, ფილმის ყველაზე დიდი გამოწვევა იყო გადასაღები ადგილები და ადგილობრივი რესურსების არ არსებობა. ყველაზე უბრალო ნივთებიც კი ძნელი საშოვნელი იყო, ყველაფერი უნდა ჩამოგეტანა. The G&E package ჩამოვიდა ბულგარეთიდან ისევე როგორც გუნდის უმეტესობა და ყველა ტრანსპორტი, ჩემი და კამერის მანქანის გამოკლებით. ისინი აქვე დავიქირავეთ მძღოლთან/პატრონთან ერთად. ჩვენ თვითონვე მოგვიხდა კარვების, კაბინეტების და განათების მომზადება. გადაღების პირველი კვირა გავატარეთ მთის პატარა სოფელში და ღამე მატარებელში გვეძინა. ეს იყო ძველი, საბჭოთა მატარებელი, რომელსაც ქვანახშირით ათბობდნენ, ასე რომ ყველას გაგუდვის გვეშინოდა. საშხაპეები და სააბაზანოები გარეთ იყო და იქამდე მისვლისთვის 100 "ცივი" იარდი უნდა გაგვერბინა. ამ ყველაფერს ემატებოდა ის, რომ რამდენიმე დღის განმავლობაში წვიმდა. გადაღებების დანარჩენი ნაწილი გავატარეთ თბილისში, ძალიან კარგ სასტუმროში, თუმცა გადასაღები მოედნები ისეთივე დარჩა. კვება იყო საშინელი, craft service (წასახემსებელი საკვები - ნამცხვრები, ყავა და სხვ.) საერთოდ არ არსებობდა (ისევე როგორც სააბაზანოები ზოგგან)... ლიფტები იქ უბრალოდ არ იყო, ისევე როგორც უმეტეს შემთხვევაში მოკირწყლული გზები. მაგრამ ამ ყველაფერს უყოყმანოდ გავიმეორებდი. ეს არის ის, რატომაც მიყვარს ფილმზე მუშაობა და რის გამოც ამას სიცოცხლის ბოლომდე გავაკეთებ."

Read More